• 17 Dec 2018
  • 08: 13 PM
Latest News arrow

മലയാളവും നായനാരും കുഞ്ഞിരാമന്‍ നായരും

മുലയത്തിന്റെ ഹിന്ദിക്ക്  ഇ.കെ.നായനാരുടെ മലയാളം. ഇംഗ്ലീഷില്‍ ഒപ്പിടാന്‍ കൂട്ടാക്കാതെ മഹാകവി പി കുഞ്ഞിരാമന്‍ മലയാളത്തില്‍ ഒപ്പിട്ടു. മാതൃഭാഷയോടുള്ള രണ്ട് പ്രമുഖമലയാളികളുടെ കൂറും പ്രതിബന്ധതയും മലയാളികളുടെ പ്രിയപ്പെട്ട കഥാകാരന്‍ ടി. പത്മനാഭന്‍ ഓര്‍മ്മിപ്പിക്കുന്നു.

തന്മ മാസികയില്‍ പപ്പേട്ടന്‍ വിവരിക്കുന്ന ഈ ഭാഷാ സ്‌നേഹത്തിന്റെ കഥ ഇങ്ങിനെ.
യുപി മുഖ്യമന്ത്രിയായിരുന്ന മുലയം സിംഗ് യാദവ് കേരള  മുഖ്യമന്ത്രിയായിരുന്ന ഇ.കെ. നായനാര്‍ക്ക് ഒരു കത്തയച്ചു. മുലയത്തിന് സുപരിചിതമായ ഹിന്ദിയില്‍. നായനാര്‍ക്ക് മനസിലാവുന്ന ഇംഗ്ലീഷില്‍ എഴുതാന്‍ യുപിയില്‍ എല്ലാ സൗകര്യമുണ്ടായിട്ടും മേല്‍ വിലാസം പോലും ഹിന്ദിയില്‍ എഴുതിയ കത്തിന്റെ ഉള്ളടക്കം എന്തെന്ന് നായനാര്‍ക്ക് മനസിലായില്ല. നായനാര്‍ സെക്രട്ടറിയെ വിളിച്ച് ഇതെന്ത് കടലാസാണെന്ന് നോക്കെടോ എന്ന് നിര്‍ദ്ദേശിച്ചു. സെക്രട്ടറി ഹിന്ദി അറിയാവുന്ന ഒരാളെക്കൊണ്ട് കത്ത് തര്‍ജമ ചെയ്യിച്ച് നായനാരുടെ കയ്യില്‍ എത്തിച്ചു. നായനാര്‍ ഒട്ടും താമസിയാതെ നല്ല കല്യാശ്ശേരി മലയാളത്തില്‍ മറുപടി തയ്യാറാക്കി മുലയത്തിന്റെ പേരിലയച്ചു. ഓന്റെ ഹിന്ദിക്ക് എന്റെ  മലയാളം എന്നായിരുന്നു സരസനായ ഈ കമ്യുണിസ്റ്റ് നേതാവിന്റെ നിലപാട്.

 പിന്നീട് യുപി മുഖ്യമന്ത്രി  പലതവണ നായനാര്‍ക്ക് കത്തുകളയച്ചിട്ടുണ്ട്. എല്ലാം ഇംഗ്ലീഷില്‍ !

മഹാ കവിയുടെ കഥ-  ഒരു കൊല്ലത്തെ കേന്ദ്ര സാഹിത്യ അക്കാദമി അവാര്‍ഡ് പി. കുഞ്ഞിരാമന്‍ നായര്‍ക്കായിരുന്നു. അവാര്‍ഡ് സ്വീകരിക്കാന്‍ മഹാകവി ഡല്‍ഹിയില്‍ ചെന്നു. അവാര്‍ഡ് തുക വാങ്ങാന്‍ അക്കാദമി ഓഫീസില്‍ എത്തിയ മഹാകവിയുടെ മുമ്പില്‍  രശീതി നീട്ടിയ സെക്രട്ടറി ഒപ്പിടാന്‍ ആവശ്യപ്പെട്ടു. മഹാകവി എപ്പോഴും മലയാളത്തിലാണ് ഒപ്പിടാറുള്ളതെന്നതിനാല്‍ രശീതിലും പി. കുഞ്ഞിരാമന്‍ നായര്‍ എന്ന് എഴുതി കൊടുത്തു. രശീതി തിരിച്ചു നല്‍കിയ സെക്രട്ടറി ഇംഗ്ലീഷില്‍ ഒപ്പിട്ടു നല്‍കാന്‍ ആവശ്യപ്പെട്ടു. തന്റെ രീതി വിശദീകരിച്ചപ്പോള്‍ ഇംഗ്ലീഷില്‍ ഒപ്പിട്ടാലേ  രശീതി സാധുആവൂ എന്നായിരുന്നു സെക്രട്ടറിയുടെ നിലപാട്. എങ്കില്‍ എനിക്ക് തന്റെ കാശുവേണ്ട എന്ന് പറഞ്ഞു കുഞ്ഞിരാമന്‍ നായര്‍ ഇറങ്ങി പോന്നു. ഈ പ്രവര്‍ത്തി സെക്രട്ടറിയില്‍ യാതൊരു ചലനവുമുണ്ടാക്കിയില്ല.
ഈ വിവരം  അന്ന് കേന്ദ്രത്തില്‍ മന്ത്രിയായിരുന്ന പനമ്പള്ളി ഗോവിന്ദമേനോന്റെ ചെവിയിലെത്തി. അദ്ദേഹം കുഞ്ഞിരാമന്‍ നായരെ തേടി ഇറങ്ങി. മഹാകവി പോകാനിടയുള്ള സ്ഥലങ്ങളിലൊക്കെ അന്വേഷിച്ച് ഒടുവില്‍ കണ്ടെത്തി. പനമ്പള്ളി മഹാകവിയെയും കൂട്ടി സാഹിത്യ അക്കാദമി ഓഫീസില്‍ ചെന്ന് സെക്രട്ടറിയെകണ്ടു. സാഹിത്യ അക്കാദമി  അവാര്‍ഡ് തുക കൈപ്പറ്റിയതിന്റ രശീതി ഇംഗ്ലീഷില്‍ വേണമെന്ന് പറയുന്നത് ഏത് ചട്ട പ്രകകാരമാണെന്ന് പനമ്പള്ളി സെക്രട്ടറിയോട് ആരാഞ്ഞു. മലയാളത്തിലെ ഏറ്റവും പ്രമുഖനായ ഒരു കവിയോട് ഇങ്ങിനെ പെരുമാറിയത് ഒട്ടും ശരിയായില്ലെന്നും ഓര്‍മ്മിപ്പിച്ചു. പനമ്പള്ളി ആരാണെന്ന് അറിയാവുന്നതിനാലാവണം സെക്രട്ടറി ഉടന്‍ നേരത്തെ മലയാളത്തില്‍ ഒപ്പിട്ടു നല്‍കിയ രശീതിയിന്മേല്‍  തുക മഹാകവിക്ക് കൈമാറുകയും ചെയ്തു.
ഇംഗ്ലീഷിനോടുള്ള  ഭ്രമം ഒളിഞ്ഞും തെളിഞ്ഞും തമ്മില്‍  നിലനില്‍ക്കുന്ന ഈ സന്ദര്‍ഭത്തില്‍ പ്രശസ്ഥരായ രണ്ട് മലയാളികളുടെ കഥ മറന്നു കൂടെന്ന് പപ്പേട്ടന്‍ പറയുന്നു.