• 07 Dec 2021
  • 01: 19 AM
Latest News arrow

ഡോ.എം ലീലാവതിക്ക് കേന്ദ്ര സാഹിത്യ അക്കാദമി പുരസ്‌കാരം

ന്യൂഡല്‍ഹി: പ്രശസ്ത എഴുത്തുകാരിയും നിരൂപകയുമായ ഡോ.എം.ലീലാവതിക്ക് കേന്ദ്ര സാഹിത്യ അക്കാദമി പുരസ്‌കാരം. 'ശ്രീമദ് വാത്മീകി രാമായണ' എന്ന സംസ്‌കൃത കൃതിയുടെ വിവര്‍ത്തനത്തിനാണ് പുരസ്‌കാരം. കെ.ജയകുമാര്‍, കെ.മുത്തുലക്ഷ്മി, കെ.എസ്. വെങ്കിടാചലം എന്നിവരടങ്ങിയ ജൂറിയാണ് പുരസ്‌കാരം പ്രഖ്യാപിച്ചത്.  അന്‍പതിനായിരം രൂപയും പ്രശസ്തിപത്രവും അടങ്ങുന്നതാണ് പുരസ്‌കാരം.

'തസ്‌കരന്‍മണിയന്‍ പിള്ളയുടെ ആത്മകഥ' എന്ന പുസ്തകം തമിഴിലേക്ക് വിവര്‍ത്തനം ചെയ്ത കുളച്ചല്‍ മുഹമ്മദ് യൂസഫും പുരസ്‌കാരം നേടി. 'തിരുടന്‍ മണിയന്‍പിള്ള' എന്ന പുസ്‌കത്തിനാണ് പുരസ്‌കാരം.
തകഴിയുടെ ചെമ്മീന്‍ രാജസ്ഥാനി ഭാഷയിലേക്ക് വിവര്‍ത്തനം ചെയ്ത മനോജ് കുമാര്‍ സ്വാമിക്കും പുരസ്‌കാരം ലഭിച്ചു. 'നാ ബാര്‍ ജാല്‍' എന്നാണ് പുസ്തകത്തിന്റെ പേര്. 

കേന്ദ്രസാഹിത്യ അക്കാദമി അവാര്‍ഡും സുവര്‍ണ്ണ കൈരളി അവാര്‍ഡും ലഭിച്ച 'കവിതാധ്വനി', 1979 ലെ ഓടക്കുഴല്‍ അവാര്‍ഡും 1980 ലെ കേരള സാഹിത്യ അക്കാദമി അവാര്‍ഡും ലഭിച്ച 'വര്‍ണ്ണരാജി', 'ജി യുടെ കാവ്യജീവിതം', 'മലയാള സാഹിത്യചരിത്രം' എന്നിവയാണ് എം. ലീലാവതിയുടെ മുഖ്യകൃതികള്‍.

സോവിയറ്റ് ലാന്‍ഡ് നെഹ്‌റു അവാര്‍ഡ്, സുവര്‍ണ്ണ കൈരളി അവാര്‍ഡ്, കേരള സാഹിത്യ അക്കാദമി അവാര്‍ഡ്, കേന്ദ്രസാഹിത്യ അക്കാദമി അവാര്‍ഡ്, ഓടക്കുഴല്‍ അവാര്‍ഡ്, അബുദാബി മലയാളി സമാജം അവാര്‍ഡ്, വിശ്വദീപം അവാര്‍ഡ്, നാലപ്പാടന്‍ പുരസ്‌ക്കാരം, ലളിതാംബിക സ്മാരക സാഹിത്യ പുരസ്‌ക്കാരം, എന്‍. വി. കൃഷ്ണവാരിയര്‍ പുരസ്‌ക്കാരം, ഭാരതീയ ഭാഷാ പരിഷത്ത് സംവത്സര സമ്മാന്‍ തുടങ്ങിയ ബഹുമതികള്‍ ലഭിച്ചിട്ടുണ്ട്.