• 26 Jun 2019
  • 05: 37 PM
Latest News arrow

സ്വിസ് ബാങ്ക് നിക്ഷേപം: ഇന്ത്യക്ക് വിവരങ്ങള്‍ നല്‍കാന്‍ തയ്യാറായി സ്വിറ്റ്സർലൻഡ് സര്‍ക്കാര്‍

25 ഇന്ത്യക്കാര്‍ക്ക് നോട്ടീസ് ലഭിച്ചു

ന്യൂഡല്‍ഹി: സ്വിസ് ബാങ്കില്‍ കള്ളപ്പണം നിക്ഷേപിച്ചവരുടെ വിവരങ്ങള്‍ ഇന്ത്യാ ഗവണ്‍മെന്റിന് നല്‍കാന്‍ തയ്യാറെടുത്ത് സ്വിറ്റ്സർലൻഡ് സര്‍ക്കാര്‍. ഇതിന്റെ ഭാഗമായി ഇന്ത്യ നല്‍കിയ വിവരങ്ങളുടെ അടിസ്ഥാനത്തില്‍ നിക്ഷേപകര്‍ക്ക് നോട്ടീസ് അയച്ചു തുടങ്ങി. വിവരങ്ങള്‍ കൈമാറുന്നതിന് എതിര്‍പ്പുണ്ടെങ്കില്‍ അറിയിക്കാനാണ് നോട്ടീസ് അയച്ചിരിക്കുന്നത്. ഈ വര്‍ഷം മാര്‍ച്ച് മാസം മുതല്‍ 25 ഇന്ത്യക്കാര്‍ക്കാണ് നോട്ടീസ് ലഭിച്ചിരിക്കുന്നത്. മെയ് 21നു മാത്രം 11 പേര്‍ക്കാണ് സ്വിസ് ഫെഡറല്‍ ടാക്‌സ് വിഭാഗം നോട്ടീസ് അയച്ചിരിക്കുന്നത്.

അതേസമയം, രണ്ട് പേര്‍ ഒഴികെ നോട്ടീസ് ലഭിച്ചവരുടെ പേര് വിവരങ്ങള്‍ ലഭ്യമല്ല. കൃഷ്ണ ഭഗവാന്‍ രാമചന്ദ് (മെയ് 1949), കല്‍പേഷ് ഹര്‍ഷ്വദ് കിനാരിവാല (സെപ്റ്റംബര്‍ 1972) എന്നിവരുടെ പേരുകള്‍ മാത്രമാണ് പുറത്ത് വന്നിരിക്കുന്നത്. മറ്റുള്ളവരുടെ പേരുകള്‍ കോഡുകളിലാണ്. ഇവരുടെ പേരിന്റെ ആദ്യ അക്ഷരങ്ങളും ജനനതീയ്യതിയും മാത്രമാണ് പുറത്തുവിട്ടിരിക്കുന്നത്.

എഎസ്ബികെ (നവംബര്‍ 24, 1944), എബികെഐ (ജുലൈ 9, 1944), പിഎഎസ്(നവംബര്‍ 2, 1983), ആര്‍എഎസ് (നവംബര്‍ 22,1973), എപിഎസ് (നവംബര്‍ 27, 1944), എഡിഎസ് (ഓഗസ്റ്റ് 14, 1949), എംഎല്‍എ (മേയ് 20, 1935), എന്‍എംഎ (ഫെബ്രുവരി 21, 1968), എംഎംഎ (ജൂണ്‍ 27, 1973).– എന്നിങ്ങനെയാണ് പേരുകള്‍. ഇവരില്‍ പലരും അനധികൃത വിദേശനിക്ഷേപം സംബന്ധിച്ച പാനമ രേഖകളിലെ വെളിപ്പെടുത്തലില്‍ ഉള്‍പ്പെട്ടിട്ടുള്ളവരാണെന്നാണ് വിവരം.

നേരത്തെ മെയ് 7-ന് രത്തന്‍ സിങ് ചൗധരി എന്ന വ്യക്തിക്ക് നോട്ടീസ് ലഭിച്ചിരുന്നു. 10 ദിവസത്തിനുള്ളില്‍ മറുപടി അറിയിക്കാനാണ് അന്ന് സ്വിസ് ഫെഡറല്‍ ടാക്‌സ് വിഭാഗം ഇയാളോട് ആവശ്യപ്പെട്ടിരുന്നത്. അതേസമയം മിസ്റ്റര്‍ ആര്‍പിഎന്‍ എന്നയാള്‍ക്ക് 30 ദിവസം സമയം നല്‍കി. ഏപ്രിലില്‍ മിസ്സിസ് ജെഎന്‍വി, മിസ്റ്റര്‍ കുല്‍ദീപ് സിംഗ് ദിന്‍ഗ്ര, അനില്‍ ഭരദ്വാജ് എന്നിവര്‍ക്കും സ്വിസ് ഫെഡറല്‍ ടാക്‌സ് വിഭാഗം നോട്ടീസ് നല്‍കിയിരുന്നു.

മാര്‍ച്ചിന് മുന്‍പ് മുംബൈ ആസ്ഥാനമായുള്ള  കമ്പനിയായ ഗിയോഡിസിക് ലിമിറ്റഡിനും അതിന്റെ മൂന്ന് ഡയറക്ടര്‍മാരായ പ്രശാന്ത് ശരത് മുലേഖര്‍, പങ്കജ്കുമാര്‍ ഓന്‍കാര്‍ ശ്രീവാസ്തവ, കിരണ്‍ കുല്‍കര്‍ണി എന്നിവര്‍ക്കും സ്വിസ് സര്‍ക്കാര്‍ നോട്ടീസ് അയച്ചിരുന്നു.

കള്ളപ്പണം സൂക്ഷിക്കാന്‍ ലോകമെമ്പാടുമുള്ള പണക്കാര്‍ തിരഞ്ഞെടുത്ത ബാങ്കുകളായിരുന്നു സ്വിസ് ബാങ്കുകള്‍. നിക്ഷേപകരുടെ വിവരങ്ങള്‍ രഹസ്യമായി സൂക്ഷിക്കും എന്നതാണ് ഇത്തരം ബാങ്കുകളിലേക്ക് കള്ളപ്പണക്കാരെ ആകര്‍ഷിച്ചിരുന്നത്. എന്നാല്‍ ലോകരാജ്യങ്ങള്‍ സ്വിസ് സര്‍ക്കാറിനുമേല്‍ നടത്തിയ സമ്മര്‍ദ്ദത്തിന്റെ ഫലമായാണ് കള്ളപ്പണ നിക്ഷേപകരെക്കുറിച്ചുള്ള വിവരങ്ങള്‍ പുറത്തുവിടാന്‍ സ്വിസ് ബാങ്കുകള്‍ തയ്യാറായിരിക്കുന്നത്.

നിക്ഷേപകര്‍ നിയമവിധേയനയല്ലാതെയാണ് പണം നിക്ഷേപിച്ചിരിക്കുന്നതെന്ന് ബന്ധപ്പെട്ട രാജ്യങ്ങള്‍ സ്വിസ് സര്‍ക്കാറിന് തെളിവ് നല്‍കിയാല്‍ ഇവരെക്കുറിച്ചുള്ള വിവരം കൈമാറും. കൈമാറുന്നതിന് മുന്‍പായി ബാങ്ക് നിക്ഷേപകര്‍ക്ക് നോട്ടീസ് അയക്കുകയും എതിര്‍പ്പുണ്ടെങ്കില്‍ ബാങ്കിനെ അറിയിക്കാന്‍ ആവശ്യപ്പെടുകയും ചെയ്യും. 30 ദിവസമാണ് നോട്ടീസിന് മറുപടി അയക്കാനുള്ള സമയം. ചില ഗുരുതരമായ കേസുകള്‍ക്ക് 10 ദിവസവും ആണ് സമയമനുവദിക്കാറുള്ളത്.