• 08 Jul 2020
  • 04: 15 AM
Latest News arrow

കൊവിഡ് തങ്ങളെ ബാധിക്കില്ലെന്ന മട്ടില്‍ ജനങ്ങള്‍; ക്വീറന്റീന്‍- ലോക്ക്ഡൗണ്‍ ലംഘനങ്ങള്‍ വര്‍ധിക്കുന്നു

തിരുവനന്തപുരം: സംസ്ഥാനത്ത് മുപ്പതോളം കൊവിഡ് രോഗികളുടെ ഉവിടം കണ്ടെത്താന്‍ കഴിയാത്തത് സമൂഹവ്യാപനത്തിന്റെ സാധ്യതയിലേക്ക് വിരല്‍ ചൂണ്ടുന്നുവെന്ന് വിദഗ്ധര്‍ അഭിപ്രായപ്പെടുമ്പോഴും ജാഗ്രത നിര്‍ദേശങ്ങള്‍ക്ക് ജനങ്ങള്‍ പുല്ലുവില കല്‍പ്പിക്കുന്ന കാഴ്ചയാണ് ഇപ്പോള്‍ കാണാന്‍ സാധിക്കുന്നത്. ഓരോ ദിവസവും ക്വാറന്റീന്‍ ലംഘനങ്ങളും ലോക്ക്ഡൗണ്‍ ലംഘനങ്ങളും കൂടുകയാണ്. പത്ത് ദിവസത്തിനിടെ വീട്ടു നിരീക്ഷണം ലംഘിച്ചത് നാനൂറിലേറെപ്പേരാണ്. മാസ്‌ക് വെയ്ക്കാന്‍ പോലും പലരും തയ്യാറാകുന്നില്ല. അതിനാല്‍ കൊവിഡ് നിയമലംഘനങ്ങള്‍ നടത്തുന്നവര്‍ക്കെതിരെ കര്‍ശന നടപടികള്‍ സ്വീകരിക്കാനൊരുങ്ങുകയാണ് പൊലീസ്. 

പത്ത് ദിവസത്തിനിടെ 407 പേരാണ് ക്വാറന്റീന്‍ ലംഘിച്ച് പുറത്തിറങ്ങിയത്. എറണാകുളത്താണ് ഏറ്റവും കൂടുതല്‍ ലംഘനങ്ങള്‍ നടന്നിരിക്കുന്നത്. 237 പേര്‍ ഇവിടെ ക്വാറന്റൈന്‍ ലംഘിച്ചു. രോഗ വ്യാപനം കൂടുതലുള്ള കാസര്‍കോട്ട് 86 പേര്‍ക്കെതിരെ ക്വാറന്റീന്‍ ലംഘിച്ചതിന് കേസെടുത്തിട്ടുണ്ട്. നിരീക്ഷണത്തില്‍ കഴിയുന്നവര്‍ പുറത്തിറങ്ങിയാല്‍ അവര്‍ക്കെതിരെയും അവരെ സഹായിക്കുന്നവര്‍ക്കെതിരെയും കേസെടുക്കാന്‍ പൊലീസ് തീരുമാനിച്ചിട്ടുണ്ട്. 

മാസ്‌ക് ധരിക്കാത്തവര്‍ക്കെതിരെയും പൊലീസ് കേസെടുക്കുന്നുണ്ട്. പത്ത് ദിവസം കൊണ്ട് 35,000 പേര്‍ക്കെതിരെ ഇതിന് കേസെടുത്തു. തിരുവനന്തപുരം, മലപ്പുറം, എറണാകുളം ജില്ലകളിലാണ് മാസ്‌ക് ലംഘനം ഏറ്റവും കൂടുതല്‍ നടക്കുന്നത്. 

 

Editors Choice