ആലപ്പുഴ: പരിസ്ഥിതി ദിനത്തിൽ കുട്ടനാട്ടിലെ എടത്വ ഒന്നാം വാർഡിലെ ജനങ്ങൾക്ക് മലയാളത്തിന്‍റെ സൂപ്പർ സ്റ്റാറിന്‍റെ കുടിവെള്ള സമ്മാനം. മോഹന്‍ലാലിന്റെ വിശ്വശാന്തി ഫൗണ്ടേഷനും ഇ.വൈ.ജി.ഡി.എസും ചേർന്നാണ്​ വാർഡിലെ 300 ഓളം കുടുംബങ്ങളുടെ കുടിവെള്ളപ്രശ്നത്തിന്​ പരിഹാരം കണ്ടിരിക്കുന്നത്​. 

നിലവിൽ കുട്ടനാട്ടിലെ ജലത്തില്‍ ആരോഗ്യത്തിന് ഹാനികരമായ ഇരുമ്പ് കാല്‍സ്യം ക്ലോറൈഡ് എന്നിവയും കോളി ഫോം, ഇ കോളി തുടങ്ങി രോഗകാരികളായ ബാക്ടീരിയകളും കൂടുതലാണ്​. ഇതുമൂലം ഏറ്റവുംകൂടുതൽ ബുദ്ധിമുട്ടുന്നവരാണ്​ എടത്വ ഒന്നാം വർഡി​ലെ കുടുംബങ്ങൾ. 
അന്താരാഷ്ട്ര നിലവാരമുള്ള പൂര്‍ണ്ണമായും സൗരോര്‍ജത്തില്‍ പ്രവര്‍ത്തിക്കുന്ന പ്ലാന്റിൽ നിന്ന്​ ലഭിക്കുന്ന കുടിവെള്ളം പൂർണ്ണമായും ശുദ്ധീകരിച്ചതാണ്​. 
വിശ്വശാന്തി ഫൗണ്ടേഷന്‍ മാനേജിങ് ഡയറക്ടര്‍ മേജര്‍ രവി ഓട്ടോമേറ്റഡ് കുടിവെള്ള പ്ലാന്റ് കുട്ടനാട്ടിലെ ജനങ്ങള്‍ക്ക് സമര്‍പ്പിച്ചു. കുടുംബങ്ങൾക്ക്​ പുറമെ സ്കൂളുകൾ, ആരാധനാലയങ്ങൾ ഉൾപ്പെടെ ആയിരത്തിലധികം ജനങ്ങൾക്ക് ഈ പ്ലാന്‍റിന്‍റെ ഗുണം ലഭിക്കുമെന്ന്​  ഫൗണ്ടേഷൻ അറിയിച്ചു. ഗുണഭോക്താക്കൾക്ക് നല്കിയിരിക്കുന്ന ഇലക്ട്രോണിക് കാർഡ് ഉപയോഗിച്ചു ഓരോ കുടുംബത്തിനും ആവശ്യമായ ശുദ്ധജലം പ്ലാന്റിൽനിന്നും സൗജന്യമായി എടുക്കാം.