കണ്ണൂര്‍: സ്വര്‍ണം പേസ്റ്റ് രൂപത്തിലാക്കി സോക്‌സിനുള്ളില്‍ ഒളിപ്പിച്ച്​ കടത്താൻ ശ്രമിച്ച രണ്ടുപേർ കണ്ണൂര്‍ വിമാനത്താവളത്തില്‍ പിടിയിൽ. ബുധനാഴ്ച  ദുബായില്‍നിന്നും എയര്‍ഇന്ത്യ എക്‌സ്പ്രസ് വിമാനത്തിലെത്തിയ കാസര്‍കോട് സ്വദേശി മഹമ്മദ് അല്‍ത്താഫ്, പയ്യന്നൂര്‍ സ്വദേശി മുഹമ്മദ് ബഷീര്‍ എന്നിവരാണ്​ പിടിയിലായത്​. ഇവരിൽ നിന്ന്​  1.10 കോടി രൂപയുടെ 797 ഗ്രാം സ്വര്‍ണം പിടികൂടി.

മുഹമ്മദ് അല്‍ത്താഫില്‍ നിന്നും 71 ലക്ഷം രൂപ വരുന്ന 1157 ഗ്രാം സ്വര്‍ണവും മുഹമ്മദ് ബഷീറില്‍ നിന്ന് 39 ലക്ഷം രൂപ വരുന്ന 640 ഗ്രാം സ്വര്‍ണവുമാണ് പിടികൂടിയത്. ഡി.ആർ.ഐയും കസ്റ്റംസും ചേർന്ന്​ നടത്തിയ സംയുക്​ത പരിശോധനയിലാണ് ഇരുവരും പിടിയിലായത്​. പെരുമാറ്റത്തിൽ സംശയം തോന്നിയതിനെ തുടർന്ന്​ ഇരുവരെയും കസ്റ്റഡിയിലെടുത്ത്​ വിശദമായി പരിശോധിച്ചപ്പോഴാണ്​ സോക്​സിനുള്ള ഒളിപ്പിച്ച സ്വർണ്ണലായിനി ക​ണ്ടെത്തിയത്​.